مواطن مصرى فالاتوبيس العصرى

 

عايش حياتى اخر تمام، بس تعبان شويه من الزكام ،
الجو أصله مليان فيروسات ،ويلا ادينى عايش والسلام
وفى مرة صحيت من نومى قلقان ، لاقيت منبه تعبان ،
نازل وششش فوق دماغى ، خلانى قومت طهقان
وقولت هبدأ يومى ، فروحت لبست هدومى،
وخلاص هروح شغلى ، وهجيب قوت يومى
وركبت فى الاتوبيس، ولاقيت مناظر تسد النفس ،
سواق كارهه حياته، وكمسرى بينادى بالبوكس
واليوم معايا بان من اوله ، بس هعمل إيه لازم أكمله
، لاقيت كرسى قولت الحقه
وبعد ما إتملى الاتوبيس بالناس ،وبقيت فى علبة سردين وبنداس
، قولت كلها شويه وخلاص
كان فى واحده ست قاعدة جمبى ، ست يعنى أد أمى ،
قالتلى إقرالى العنوان فالورقه ، وشرحت كتير ولما تعبت قولتلها استنى
قولت خلاص أخود ثوابها، وانا نازل اروح اوصلها
، لأنها فى طريقى ودا كل آمالها
بصلنا الكمسرى وقال الاجرة ، وكله دفع إلا واحده ،
فكرت تديله جنيه معدن، ويومها بقى اسود فى لحظه
وتقوله مفيش معايا غيره ، قالها وانا عمرى ما هشيله
، رد السواق قال هتدفعى يامدام غصب عنك يلا اديله
قال الكمسرى اتقى الله محدش بياخده ، قال يعنى هو اتقاه فينا دا محدش عاجبه
، نازل خناق فيها ومحدش قادر يرده
وأمرى لله دفعتله غيره وخدته انا ، قالتلى روح يسترها معاك ربنا،
وإستعجبت أوى من نفسنا ،مهى كلها فلوس مصرنا
قولت يلا وعديت الموضوع، لحسن يفتكرونى بتكلم فى الممنوع ،
ويحدفونى ورا الشمس، وأفضل انا موجوع
وكمل الاتوبيس طريقه عادى ، وشويه ووقف عشان واحد عجوز يركبه وراضى
،وقف ياعينى فى وسط الزحمه بيقول يا هادى
وطبعا زمن الشهامه راح، محدش قام يقعده يرتاح
قومتله يقعد قالى انا عمك صلاح ، خرجت اجيب لبنت بنتى تفاح
بصتله كتير وضحكت ،قولتله ربنا يباركلنا فيك يا حج
، قالى شكرا ليك يا ابنى ويباركلى فيك بجد
وفضل الطريق ماشى شويه ، حبه يجرى وحبه يمشى بحنيه ،
مهى الزحمه عامله عمايلها فيا ، بس هنعمل ايه بلاش نعملها قضيه
وفجأه علبة السردين اتملت تانى ، وأزمة الزحمه مش رحمانى
، خلاص مش قادر أتنفس آه يااانى
ولاقيت الراجل واقف جمب البت مفيش مسافه ،
والتحرش بيزيد وبقت سخافه، والمنظر يحزن جدا وبقى خرافة
وهتخانق مع مين ولا مين يا ندامه، و كل واحد بقى بيقول نفسى والسلامه
، لحد ما البلد اتملت بالحرامية واللمامه
وخلاص هموت واخرج من الاتوبيس، دى دنيا كل واحد فيها بقى أبليس
،وبدعى الله ينجينى من المهالك يا حفيظ
وخلاص أنا وصلت ، وروحت شغلى وخلصت ،
لكن طول الوقت فكرت، هخرج ازاى من الكبت ، لكن فى النهايه اكتشفت
انى اللى ابات فيه هصبح فيه قال يعنى كده ارتاحت ،
ولو غيرت انا لوحدى من نفسى هبقى فرحت
طول ماللى فوق واجعنى ، واللى تحت خلاص مش سامعنى
، يبقى اقعد فى بيتنا أكرملى ، بس كده الكل هيسبنى
واخسر انا نفسى وشغلى ، ايه دا .. دا كمان الاتوبيس هيفوتنى
،سلام بقى لحسن مش ياخودنى