عمرك شوفت استقرار علاقة بيوجع ؟

السلام عليكم ورحمة الله وبركاته  

عمرك شوفت استقرار علاقة بيوجع

الموضوع بسيط جدا

العلاقات الإنسانية من زاوية معينة

ألا وهى

بداية العلاقات

المنطقى إننا طول ما إحنا عايشين بنعمل علاقات جديدة مع بشر جداد علاقات صداقة بقى و للا زمالة

و للا أخوة و للا حتى حب كله موجود و كل علاقة و ليها كيانها و أسلوبها لكن الفكرة هنا هى بداية العلاقة مع الطرف الثانى

غالبا البدايات متشابهة بتلاقى نفسك فى علاقة جديدة مع حد و عايز تعرف كل حاجة عنه و هو يعرف كل حاجة عنك بتبقى عايز تشده يمكن . عايز تبين احسن حاجة فيك علشان يتشد مش قصدك تغش لكن عايز تحط اول طوبة . حد هيقولى بس كده الأساس ده باطل هقوله يمكن .. فى ناس تانية بتبقى عايزة تبان على حقيقتها أوى علشان العلاقة تتبنى صح و عل نور و دول مش كتير مش قصدى ان الناس بتمثل لكن بتبين الحلو اللى فيها الأول و بتتساهل فى الرأى من غير تعنت و إصرار

نيجى تانى لأول العلاقة بتلاقى الاهتمام غالبا مكثّف و شديد ربما هو فضول أول قطفة او ان كل غربال و له شدة بس فجأة بعد ما بتشبع فضولك او العلاقة توصل لمرحلة مستقرة بتلاقى تصرفات مختلفة قد تراها فتور و قد تراها ان ده شئ منطقى جدا و طبيعى جدا ماهو كل

curve

بيبدأ من الصفر و يطلع لحد الدرجه المثلى او اقصى نقطه يعنى

و بعدين يفضل مستقر شوية و دى المرحلة اللى بتحس فيها بالزلزال و تقول هو فى ايه

ناس كتير مش بتدرك ان ده امر طبيعى جدا و انهم دلوقتى المفروض فى افضل مرحلة فى العلاقة لان المنحنى معرض للتناقص من تانى بتلاقى نفسك فجاة بتكر كل اللى يعرفوا الطرف التانى اللى معاك فى العلاقة و بتقول ده غشنى بقى و احنا اصحاب يكون بيعاملنى كده و لكن لما كنا مش صحاب كان بيبقى مهتم بيا و تحس ان صنم او تمثال الطرف التانى اتكسر مليون حتة الموضوع هنا مقسوم شقين لازم نوضحهم الاول

أول شق

ان ده ممكن يكون تطور طبيعى لمنحنى العلاقة زى ما شرحت و ساعتها هيكون دى حاجة بتحصلنا كلنا

و لازم نوضح ان التغيير بيكون مش جذرى تماما و بيكون تدريجى و الانسان بيعرف فعلا انه فى مرحلة مستقرة من خلال المواقف اللى بتحصل و بتأكد ثبوت العلاقة او اهتزازها

ثانى شق

ان ممكن انسان فعلا يكون كان كويس لكن فجاة اتغير لسبب او لآخر ساعتها بتكون دى علاقة بدأت تنهدم و كتير بتتخيل انك هتصاحب ناس او هتتفق معاهم لكن بتلاقى لا احنا مجرد زمايل او علاقة عابرة و العلاقة مش بتنتهى بالظبط لكن بتقف عند مرحلة اولية غير المتوقعة و ده اللى بيسبب خيبة امل احيانا خصوصا لما يكون التوقف ده من جانب واحد و بس

بالنسبة لى مشكلتى الأولى كانت انى بتعب قوى لما العلاقة بتستقر مش علشان انا خايفه بالظبط لكن لانى مستوى اهتمامى باللى معايا مش بيتغير و ببدأ أشك أو أقلق لانى متوقعة المثل من اللى قدامى بعد طول عناء اكتشفت السبب

واللى هو ان كل شخص عايز ياخد بنفس الطريقة اللى بيدى بيها بغض النظر عن النسبة و التناسب

يعنى لو انا بحب القراية مثلا و احب اللى يحبنى يجيبلى كتاب هدية هلاقينى بهادى اللى بحبه بنفس الشئ

رغم انه ممكن يكون بالنسبه له كلمة حلوة احسن كتير وده اللى بيبوظ علاقات كتير لان الواحد لازم يدى اللى قدامه اللى هو بيحبه مش اللى هونفسه بيحبه

كان فى جملة بتعبر عن نفس الفكرة بس من الناحية التانية

كانت بتقول

حارب عدوك بالسلاح الذى يخشاه لا بالسلاح الذى تخشاه انت

الفكرة هنا واحدة تقريبا

لازم نفهم ان ممكن انسان يكون عقلانى فانه يدينى ميسد كول بيساوى عندى انى اقعد افكر فيه 3 ايام متواصل لانى مثلا رومانسية

و ده ما يعيبوش و لا يعيبنى

زى النباتات بالظبط الصبار ممكن يعيش فى الصحراء و فى نباتات تانية لو ما سقيتهاش كل شوية تموت فكرة ان كل ميسر لما خلق له و الطبيعة البشرية مش ثابتة

بس انك تفهم حاجة و انك تتقبل الموضوع حاجة تانيه خالص

يعنى مثلا انا وصحبتى الانتيم حددنا قواعد لعلاقتنا من البداية زى الوقت المناسب لكلامنا والايام اللى مينفعش وكده  المهم انى فرحت وقتها لاننا متفقين فى قواعد معينه

لكن فى وقت تانى لو مقربة من حد تانى واتعودت منها على اهتمام معين بشكل اننا نتكلم علطول ونرن على بعض علطول وبعد فترة الاهتمام منها يقل وترن كل فترة طويلة وقتها زعلت وحسيت ان صداقتنا باظت وكان رد فعلى وقتها مشوش مش عارفه هل هى حست ان صداقتنا متنفعش او انها لاقت صديقه تفهمها اكتر منى وعملت خطوات كتير وكانت أنجح خطوة هى  لما سألتها على بلاطه قالتلى ان صداقتنا زى ما هى وانها مش بتتصل بناس كتير ودا ميمنعش ان علاقتنا مازالت قويه ساعتها ارتحت شوية بس كانت ليه كده معايا فى الاول  

 يعنى انا فى علاقاتى اللى عارفة انها هتطول لما بهتم و اعود حد على قدر معين من الاهتمام مش بيقل سواء انا مشغولة وللا ورايا حاجة من ساعة الموضوع ده قررت انى ما اعملش لحد تمثال لان كلنا بشر و كونه غير صورة فى دماغى ده مايعنيش انه انسان سئ لكن معناه ان عادى هو بشر مش عارفة يمكن مش غلطته اللى بنعمله تمثال و يتكسر فيه هو على اد ما هى غلطتنا احنا اننا عملناله تمثال من الأساس فى جملة قريتها فى كتاب قبل كده طبعا مش فاكرة اسمه كانت بتقول

تصدمنا الحقائق المريرة و إذا بأصنامنا تهوى من عليائها حطاما و إذا بنا فجأة ندرك اننا بشر

هى كده ببساطة مطلقة

....

اى حد بيحاول يقوى علاقته بيا فى الأول بيكون فى اهتمام زيادة بتعامل معاه عادى جدا - مع الاهتمام - و بقول دى لحظة طيش و هتعدى خلينى مأقلمة نفسى ع المرحلة اللى بعد كده خلينى عايشة فترة استقرار

curve

العلاقات و ماليش دعوة لا بالطلعة و لا بالنزلة

المهم من ده كله

إنى طول عمرى كنت بسأل نفسى هل الناس بيعانوا نفس معاناة استقرار العلاقة

و للا كل الناس عندها وعى فطرى و انا بس اللى احتجت وقت لحد ما افهم الموضوع ؟